Literaturland


Valentin Surber

Sepp – Ossesiiter im Chrache

2011

In der Publikation Heimat und Wahnsinn lassen die Herausgeber unter anderem den Landwirt Sepp (Josef Räss) über sein «Ossesiiter»-Tum sinnieren. «Sepp wohnt seit dreissig Jahren alleine im Chrachen, für seinen Arbeitsweg vom Haus zum Stall nimmt er den Jeep», heisst es in der Fussnote dazu.

Hoho. Vo dene Ossesiiter, wie s ii ääne bi, ged s äbä nomme ase vil. Aber wa di andere tenkid, säb ischd mer gliich. Ond en Professor het mer ämool gsääd, dass es därig Ort, wie s Appezellerland ääne ischd, nomme vil omme hed. Joho, er hed s gsääd, dä Professor.

Da Huus doo hed en huere schöne Ofe. En aalte, aber dä tot no tiptop. Ond wenn amel e Chue chalberid, denn schloof i do obe ond mach ä Füür. Me mos guet luege, dene Tierli.

Hend er en o gsee, vorig, de Fochs dai one? Am Omeschtriele. Ond hüt Morge ischd s huere schöö gsee: sönd dai uf säb Bödeli fööf Reh choo. Äfocht schtoo plebe ond hend gfrässe. Ond d Hönd sönd doo gläge ond i han mini Ärbet gmacht. Wenn nor ii ond d Hönd doo sönd, denn chömid ali vöre. Die schmeckid s äbe, de Gschtank vo de Puure, wenn die bi de Saue ond de Chüe gsee sönd. Joho, die Reh sönd gaanz gfitzti. I tenk s all wider.

Di Gschiide hönd anders voor. Mit em Kunschtdünger ond all demm. Wenn s därig Ossesiiter, wie s ii ääne bi, nomme ged, denn vewilderet doo alls. Waldet alls zue. Im Sommer mönd er emol choo, denn ischd s no vil schönner. Denn schprüüssid all Blueme. Ond denn hed s amel öppe Lüüt, wo chömid go luege. Wel s därig Ort, wie dää ääne ischd, nomme ase vil ged.


Publiziert in: «Ich wäre überall und nirgends». Appenzeller Anthologie. Literarische Texte seit 1900. Herausgegeben von der Ausserrhodischen Kulturstiftung. Schwellbrunn: Appenzeller Verlag, 2016. S. 561.

Erstpublikation: Fabian Harb und Valentin Surber (Hrsg.): Heimat und Wahnsinn. Trogen: Viertel-Verlag, 2011. Unpag.